مهما يكن اسم وصفة الشخص ،لم يعد يعنيني شيء ،ولا يعنيني احد، واعرف جيدا ما يحاك ،واتحمل مسوولية كل كلامي ومانيش ساكتة ومانيش خايفة ،لاني لم اعش حياتي بخنوع et j’ai pas de comptes à rendre à personne …
جملة الايقافات والمداهمات ،والملفات المفبركة المورط فيها قضاة عرفوا بانتمائهم لبيت الطاعة ،وامنيين فيهم المعزول وفيهم المباشر ،الذي اخضع هواتف المعارضين لنظام قيس سعيد للتنصت وحاطين كراهب تعس على ديارهم ومقرات عملهم ويبربشوا عالناس في كل بلاصة ،سلوك قديم تجدد ..
كل هذا يتم الاعتداء والملاحقة القضاءية الظالمة التي تنشر قراراتها على الصفحات قبل ان يعلمها المتهم نفسه ،الهدف من كل هذا الترهيب والتخويف وزعزعة السلم الاجتماعي وبث الفتنة والخوف في قلوب الناس ،هل لهذا مكان في بناء دولة القانون والحرية والعدالة الاجتماعية ؟
نور الدين البحيري هبط تدوينة ،يمشي رءيس وحدة الارهاب بكاتب وكيل عام بالنيابة تهبط عليه عشرين كرهبة ،يهزوه من وسط داره ،وحد ما يحكيلي راه محامي وعنده ضمانات انسوا هوما قضاة عزلوهم ببطاقة ارشادية امنية ،ومحامين دكوهم في الحبس بلا ادنى مراعاة القانون …هذا الكل الهدف منه تركيع الناس زعمة زعمة الي نقرروه نعملوه ،القضاء عندنا ،والامن عندنا والسلطة عندنا اش خليتوا بربي …
تو كيفاش كي نقرا مراسلة كي هكة ونتفرج كي التوانسة الكل على film action مداهمة ليلية لدار عقاب الليالي ،كيفاش نعمل مانساندش نور الدين البحيري قيادي النهضة الي نختلف معاها الف درجة والا نقول هالنظام غبي صنعوا منهم ابطال يذهبون للسجون رافعين شارة النصر مبتسمين !!!!
اذا هم ضحايا السلطة ،وانا الله غالب ديما ضد السلطة ….
صديقي وزميلي الازهر العكرمي مشاء يفطر ،يا سيدي مشاء يناقش في الازمة السياسية مع جملة معارضين لبيت الطاعة يلقى روحه متهم في قطب الارهاب …تًو هاذي بلاد !!!
هاني باش نقول كلمة ،وراني نستنا في دوري وكيف ما قلت لاحد الناصحين لي بالصمت لان الوضع خايب وووو هاذي بلادنا ودفعنا فيه ثمن الحرية من حياتنا وصحتنا واذا كاتب مازلنا ندفعوا بطبيعتهم يعرفوا عنوانا وحياتنا بحكم ملاحقتهم السرية والعلنية .
١/ وطن يضرب فيه القضاء والقضاة ويستهدفون فيه في قوتهم وامنهم وقراراتهم ليس بوطن انه "غابة " .
٢/ وطن تجذر فيه الفتنة والحقد والايديولوجيا والشعبوية هو كسجن الكل فيه يخاف من الكل …
٢/ للظلم جولة وللحق جولات …كلنا في حالة سراح موقت .
٤/القضاة والامنيين والسياسيين الذين لم يتعظوا من التجارب السابقة نقلهم راجعوا التاريخ والجغرافيا افضل لكم ولشعبكم …واخيرا الظلم مؤذن بخراب الاوطان …
وراني نقلكم يسقط الانقلاب.