وجِي دُور الجِّمَل، كَان اللي يتَحِمَل ويمرڨ م الصَّف يجِيه المقدم ويِشُكَّه بِالمِشَك في صَدْرَه وإلا زِنْدَه وإلا خَدّه. ﭬدمت حتَّى أني، شَدْنِي المقدم مِنْ زِنْدِي وتَمْتَم بكلام ما شَدَّاتَاش، آمَا معناه أنِي عَشَّقِت عل دُور الجِّمَل…
في كُل مرض أمّي عندها دُوَا، وكانت تـﭬول: دُوَاء المَهَبُول عند الله مقبول. …
...وجِيرَاننا كِيف كِيف، ثْلاث عْيَال في حُوش واحدـ كُل واحدة ترﭬُد ﭬِدّام دَارْها. ولا عيلة منها تسمع كلام العيلة الأخرى اللي بعيدة عليها خمسة ستة ميترو. النّاس الكُل ساكتة، لا ثَمَّة لا تَلِفْزَة ولا حتى رَدْيُون.
ما نتفكرش ﭬدّاش كان عُمْرِي مْنِين سْمِعْت أوَّل مرَّة كَلْمَة "جْنِيد البُوم"، ما ﭬالِّي حدْ آش تِعْنِي، وما سَألتِش عَلِيهَا، أمَا فهمت اللّي هِيَ عِيَّارة لعَرْشْنا إحْنِي، أولاد عمّار. "جنيد البوم" تعني عددهم شْوَيْ. …
Les Semeurs.tn الزُّرّاع