المحتوى اللي يبني الجسور أقوى برشا من الضجيج اللي يزرع الكراهية.

الهستيريا اللي صايرة ضد صانع المحتوىMed.chou اللي صوّر جمال أفغانستان وطيبة شعبها تكشف حاجة وحدة برشا ناس تعاني من "استلاب ثقافي" يخليهم يشوفو العالم بعين الإعلام الغربي ومش بعين الحقيقة.

أفغانستان أرض حضارات قديمة .. أرض جلال الدين الرومي.. وأبو الريحان البيروني.. وابن سينا اللي أصوله من تلك الربوع… يعني تاريخ وثقافة وأصالة مش مجرد نشرة أخبار متاع حروب. وكي يمشي إنسان بالكاميرا متاعو ويوثّق كرم الضيافة..النظام..النظافة..وعزة النفس عند شعب بسيط هذا يتسمّى أنثروبولوجيا بصرية وتوثيق إنساني راقي مش "تبييض".

الغريب إنو اللي يهاجمو فيه اليوم هوما نفسهم اللي يصفقو لأي يوتيوبر يمشي يصور فقر ولا فوضى في بلداننا باش يرضي عقدة النقص عند المتفرج الأجنبي. أما كي يتكسر القالب النمطي وتبان صورة مشرّفة لشعب جميل وقتها يفيق "بوليس الفكر" ويبدأ في التخوين والشيطنة!

فرق كبير بين واحد يسافر باش يكتشف الإنسان ويكسر الصور النمطية وبين قطيع يعيش في فقاعة إعلامية ويخاف من الحقيقة لمجرد إنها تخالف برمجتو المسبقة.

الوعي عمره ما كان إنك تردد كلام القنوات… الوعي هو إنك تشوف بعينيك وتحكم بعقلك وتحترم ثقافات الشعوب مهما اختلفت معاك.

المحتوى اللي يبني الجسور أقوى برشا من الضجيج اللي يزرع الكراهية.

برافو Med.chou

Poster commentaire - أضف تعليقا

أي تعليق مسيء خارجا عن حدود الأخلاق ولا علاقة له بالمقال سيتم حذفه
Tout commentaire injurieux et sans rapport avec l'article sera supprimé.

Commentaires - تعليقات
Pas de commentaires - لا توجد تعليقات