إثر تدوينتي الأخيرة على بطاح جربة، كتب لي ما يلي صديق ، مهندس قريب من قطاع الفسفاط: هاي مشترة من مشاكل تونس الحقيقية الي كانت سبب في ما أصبحنا عليه : الخط الحديدي قفصة / قابس لنقل الفسفاط مغلق!
كاتب عام نقابة tractionnaires (سواق القطار) طلب من الPDG باش قريبه tractionnaire معاقب، يرجع يسوق بعد خمس سنين من الي بعدوه الى مصلحة اخرى. ال PDG ما سمعش الكلام و طبق القانون. من حينك اضراب و تسكير السكة….لمطالب مهنية …
السكة هذيك تنقل 7000 طن فسفاط في اليوم الي لو كان نصدروه كيف ما هو ، بسعر 350 دولار الطن ندخلوا 2,5 مليون دولار في اليوم او 8 مليون دينار. يعني في الشهر75 مليون دولار أي 240 مليون دينار. زيد ال sncft تخسر 100 الف دينار يوميا يعني 3 مليون دينار في الشهر (2 مليون دينار فقط أجور أعوان).
زيد خط قفصة / صفاقس مسكر توة سنين على خاطر بعض العشرات من "المعطلين" عن العمل من المكناسي و منزل بوزيان يحبوا يترسموا بكبانية الفسفاط CPG معناها صارت الخسارة دوبل : 150 مليون دولار في الشهر. و لو كان نصنعوهم اسمدة نزيدوا قيمة مضافة ب 75$ في الطن يعني 30مليون دولار شهريا اخرى.
زيد معمل المضيلة 2 الجديد ، الي جاهز اما مسكر على خاطر بعض العشرات الي خدموا في الشانطي يحبوا يترسموا زادة ، و نخسروا هكاكا حوالي 500 مليون دينار في العام ، بخلاف الشركات التونسية الي خدمت المعمل و أفلست على خاطر موش خالصة، و الشركات العالمية الي شاكية بينا في الخارج و طالبة تعويضات بالملايين من الدولار.
و زيد منجم ام الخشب و المكناسي المعطلين ، و الي كانوا ينجموا يضيفوا سنويا 2 مليون طن الاول و نصف مليون طن الثاني ، علما الي انتاجنا في 2010 كان 8 مليون طن و بهاذم الزوز يصير 10ملايين و نصف. البرنامج السنة نعملوا 6 مليون طن . ان شاء الله نوصلوا 4 ملاين .
و زيادة عن ذلك عندنا مخزون جاهز في الرديف و ام العرايس ب 2 مليون و 500 الف طن يعني بسعر السوق 750 مليون دينار لو نصدره على حالته.
باخرة من بنغلادش تنتظر في البحر قدوم حمولتها المتعطلة من اضراب سواق القاطرات و خطايا تأخير بألاف الدولارات مع ضياع المصداقية. المركب الكيميائي بقابس معطل لان حمولة البخارة souffre متعطلة في صفاقس لغياب القطارات. شركة فسفاط قفصة و المركب الكيميائي عندهم نفس رئيس مجلس إدارة الي هو إداري تكوينو مراقب مصاريف في نفس الوقت عنده مسؤوليات هامة مع رئيسة الحكومة.
و عندهم نفس المدير العام الي هو اداري مراقب مالية و خرج للتقاعد من مدة ولم توضح وضعيته الإدارية الى الان.
في كل العالم المناصب هاذي يشغلها مهندسين من Ecole Polytechnique و Mine و كانت كذلك.
موش كان مشينا حلينا المشاكل هاذي خير من الي ماشين لواشنطن نستجدي في صندوق النقد الدولي؟؟".
الي مازال يسأل "ما هي الحلول للخروج من الأزمة؟" نقلوا …..الشركات الأهلية …