بصراحة كل شي هضمتو في الخطاب الانتخابي لهياكل المحاماة، كل شي هضمتو الا حكاية "محامي مهني"... اش معناها؟ معناها بش يدافع على مهنة المحاماة ومكاسبها فقط؟ معناها مش بش يدافع على الحقوق والحريات خارج إطار خدمتو؟ معناها الهم السياسي متاع البلاد ما يعنيهش؟ معناها ما يهموا كان المصالح القطاعية فقط لا غير؟
بالطبيعة شي طبيعي انو كل محامي منتمي لهياكل المحاماة من واجبو الدفاع عن المصالح القطاعية للمهنة والمفروض هذا يعملوا كل مترشح لهياكل مهنة المحاماة أو غيره... لكن بعد هذا اش فمة؟ وشنوة المهنية بخلاف هذا؟
الفكرة اللي ترسخت عندي في الخرافة هاذي أنو "المحامي المهني" ما ينجم يكون كان حاجة من اثنين:
- يا إما محامي "خالي الوفاض" عديم الإنسانية، ولا لون ولا طعم ولا رائحة له…
- يا إما محامي منتم لجهة سياسية معينة يحشم حتى أنو يعبر على الانتماء إليها…
صحيح... المحاماة تعيش واقع صعيب... وحتى ال gagne-pain فيها ما عادش مضمون... وأغلبية المحامين -كيما بقية شعب الخضراء- ما عاد خالطين على شي... أما نحبوا والا نكرهوا المحاماة ماهيش مجرد مهنة للاسترزاق... ما هيش مجرد خبيزة... المحاماة أكبر من هكا برشة... وما ينجمش يكون المحامي محامي إذا ما يكونش حامل هم البلاد... وإذا ما يكونش صاحب قضية... مش مجرد "مهني"... يسترزق من قضايا الناس...
مهني؟؟؟ مهني هي اللي طلعت بودربالة وخلاتو عميدا للمحامين أحب من أحب وكرهت أنا ما كرهت. . مهني؟؟؟ إذا هذا l'atout الوحيد متاعك... شد دارك واتلهى ببيروك ومارس "المهنة" متاعك: الرسالة عندها ناسها.
نحبوا رجال صحاح ونساء صحاح… نحبوا مواقف مروءة… نحبوا التزام بالدفاع عن الكرامة وعن الحقوق والحريات وقيم الديمقراطية… نحبوا محاماة شوكة في حلق الاستبداد… كفانا مهنية ومهانة.