اش يقول علينا العالم لما رئيسنا المفدى الي مستانس بشهرية مساعد لا تفوق 2200 د يصبح يقرأ في أرقام فيها برشا اصفار حتى وصل لا يفرق بين المليون والمليار ... ايه عاد اشبيه قد يقولون جماعة الشعبوية والشعب يريد !!! لا يا سيدي شبيه ونصف :
كانو ما يفهمش في الأرقام يا إما يتعلم وإما يسكت. 24 بنك تبرعوا ب 160 مليون دينار ... صحيح هذا مبلغ كبير يبان للمساعد الي مستانس بشهرية متواضعة ...لكن يا سيدي هذه راهي دولة موش قهوة المنيهلة ...هذا مبلغ في دول العالم يحشموا حتى باش يهديوه لجمعية خسي الذباب الانعز ...وهو يقول تاريخي !!! لا تاريخي ولا مريخي .
باهي وبربي كيفاش حكاية الفلوس الي كانت جايت قروض و هيبات للدولة وتم تحويلها الى بنوك اجنبية ... يا معلم يا مساعد راهو منذ 2001 ، 6 أكتوبر 2001 بالضبط باش تحول اكثر من الف دولار يلزمك تعلل وإلا راك تدخل في منظومة تمويل الإرهاب العالمي وكل فرنك زايد يتحول بنكيا مراقب ...عاد اذا تم هذا فالجهات المانحة والمسؤولين التوانسة الي هربوا هذه الأموال الزوز متهمين بتهريب الأموال وتمويل الإرهاب.... ايا سيدي ولاتشي الدول المانحة متهمة الان في تهمة تاريخية كيما يقول هو .
يا راجل راهو ما يجيش هكة ...يا راجل رانا فاهمين انه مسلسل كل يوم خطبة باهي ويلهي الناس و رانا فاهمين انك تلبي مطلب شعبي قديم متاع الجمهور في علاش المسلسلات في تونس كان في رمضان وعلاش ما توليش يومية ..ايه باهي هاو عنا مسلسل يومي لكن راهو ما يجيش هكة ....
يا راجل رانا ما خليناش حبيب لا في إثيوبيا لا في ليبيا لا في اروبا لا في أمريكيا....يا راجل وين هاززنا وين ماشين ....راهو هذا شعب يعرف يصبر ويعرف يشطح ويعرف يدور في الحياصة ....عاد فبحيث كيما قال المرحوم زميلك ويهديك ربي ركز...ركز ...ركز وقول جملة مفيدة ...جملة وحيدة مفيدة ....يا حسين.