صحّة شريبة الجميع وتقبّل الله صيام الجميع وقيامهم ... عاد ماني نسمع في جماعة يحكيو على إمكانيّة الطّعن بعدم الدّستوريّة في القانون الأساسي عدد 50 (متاع المحكمة الدستوريّة) بعدما تم التصويت عليه نهار 05/04 سواء من رئيس الجمهوريّة او حتّى من مجموعة من النّواب …
طبعا الجماعة هاظم فيهم شكون يحكي عن حسن نيّة ويحب من توة يشوف مخرج من الأزمة السياسية الجاية لا محالة لكن فيهم زاده شكون مشوي مكوي ويعتبر التصويت لي صار لفائدة مشروع القانون نكسة وهزيمة في طرح نطاح الأكباش بين باردو وقرطاش ومازال مراهن عالتعطيل والتعرقيل ...
لا علينا ... فقط الجماعة هاظم حبّيت نحطّلهم في بالهم انّ نصّ مشروع القانون بعد ما تم التصويت عليه ماعادش ممكن باش ينزادلو ولا ينقص منّو ولا حرف لو كان يجيولو قاضي فاس ... علاش؟؟
تتفكروش مشروع القانون لي بعثوه النّواب للإخشيدي باش يختمو واللي هو بيدو عاود بعثهولهم عن طريق صاحب البريد ومعاه هاكي الرّسالة بوعرضين؟؟ المشروع هذاكا مجلس النّواب عاود صوّت عليه بصيغته الأولى من غير ما يبدّل فيه حتّى كلمة.. وبما أنّ الإخشيدي وقتها مارس حقّ الرّد من غير ما يطعن فيه بعدم الدّستوريّة ماعادش ينجّم يطعن فيه بعدم الدّستوريّة ولا يردّو مرّة أخرى خاطرو ولّى مشمول بالحالة المذكورة بالفصل 81 فقرة 4 (لي تنصّ على الختم الوجوبي في ظرف 4 أيام) موش فقرة 3 كيما يقولو الجماعة لي حكيتلكم عليهم …
دونك سي رمزي ماعادش عندو حتّى خيار إجرائي سوى ختم المشروع والاذن بنشره في الرّائد الرّسمي قبل ما يوفى نهار 8 ماي 2021.. بطبيعة الحال هذا إذا كان سي رمزي يعتبر نفسو رئيس لتونس موش عدوّ ليها ولمؤسساتها وشعبها..