رئيس الجمهورية يردّ مشروع قانون المحكمة الدستورية إلى مجلس النواب....و هذا من حقّه دستوريا...و لا أحد يمكن أن يعارضه... لكن، الخطير في الأمر جملة الحجج التي أوردها بيان الرئاسة و التي ارتكز عليها الرئيس لممارسة حقّ الردّ:
* التعلّل بالآجال الدستورية و الاستناد إلى الفقرة 5 من الفصل 148 من الدستور الذي ينصّ على ما يلي: "يتمّ في أجل أقصاه ستة أشهر من تاريخ الانتخابات التشريعية إرساء المجلس الأعلى للقضاء، وفي أجل أقصاه سنة من هذه الانتخابات إرساء المحكمة الدستورية".
يعني بهذا المنطق الغريب: أولا المجلس الأعلى للقضاء وجوده غير دستوري (بحجّة أنه تمّ تركيزه خارج الآجال) فكيف يتعامل معه الرئيس مع مؤسسة يعتبر وجودها غير قانوني !!!
ثانيا و بنفس الإسقاط يستحيل تركيز المحكمة الدستورية (بعد سنة 2015) دون تنقيح الدستور و الرئيس لن يمضي مستقبلا على قانون متعلّق بتركيز المحكمة و لو تمّت المصادقة عليه ب 131 صوت...!!!!
* "الابتعاد عن القراءة غير العلمية و غير البريئة للدستور..."
هنا السّؤال من يحدّد طبيعة القراءة علمية كانت أم لا و ماهي شروط القراءة العلمية!!! هل من المعقول أن الرئيس يتّخذ قرار ردّ القانون إلى البرلمان لأنه يعتقد أن فيه سوء نيّة من المشرّع (قراءة غير بريئة)...؟؟
توّة هذا معقول!!!
رئيس يعطّل القانون بحجج واهية و غير منطقية و مضحكة !!! أستاذ قانون دستوري يرفض و لن يسمح بتركيز محكمة دستورية!!! رئيس منتخب في نظام ديمقراطي يعرقل استكمال البناء الديمقراطي!!!
ياخي وين ماشيين!!! إلى متى هذا العبث!!!!
المحكمة الدستورية راهي فيها 12 عضو: 4 يعيّنهم الرئيس ، 4 يختارهم المجلس الأعلى للقضاء و أربعة ينتخبهم البرلمان.
يا جوقة اضرب و الشعب معاك و تركيز المحكمة الدستورية غير بريئ و الهدف الخفيّ هو عزل الرئيس... موش مشكل ناخذوكم على قد عقولكم: يا سيدي السياسيين بيهم و عليهم و إلي باش ينتخبهم البرلمان بيهم و عليهم و "أفسد منهم ما ثمّاش" و نيّتهم غير بريئة و مقعمزة…
أي و البقية...؟؟؟
الثمانية الأخرين يعني 2/3 خارجين عن "التجاذب السياسي" (نصفهم يختارهم الرئيس و النصف الآخر قضاة)... يعني نظريا الأغلبية عند الرئيس أو في أضعف الإحتمالات أغلبية محايدة…
مالا علاش رافض الرئيس تركيز المحكمة؟؟ علاش تبرروا في حاجات ما تتبررش...قلونا من شنوّة بالضبط خايف السيّد الرئيس!!!
راكم كثرتوها...راهو الشعب يضحك عليكم...بجاه ربي اسكتوا راكم تسخفوا...راهو معادش عندكم وجه تدافعوا بيه على حاجات مفضوحة و عريانه كيف إلي صايرة.
*بشير اليوسفي : اعلامي