عشرين مليون ياخذها ديواني بسيط باش يعدي بضاعة مهربة..ياخذها نقابي فاسد باش يسهل تعيين واحد..ياخذها جامعي صاحب مبدأ باش ينجّح واحد زلاط في الكاباس..ياخذها موظف فاسد باش يعطي حق ويتحيل على القانون..الناس باش تطيح الاسوام في سوق الاغتيالات السياسية…
أداة الجريمة خبزة...! زعمه ضامنين ان الرئيس هو لي باش ياكلها موش مرتو ولا واحد اخر من العائلة؟ ضامنين انو نهارتها ما طيبوش كسكسي ولا مقرونة؟
باهي عملو مرمز والخبزة المسمومة فضلت وقعدت في كوجينة القصر لين يبست وخرجتها مرت الرئيس في ساشي بلاستيك عطاتها للجنّان متاع القصر خاطر عندو ولد عمو يربي في العلالش نفّخها بالماء في الليل وعطاها لعلوش كان معربن عليه جزار من حومة شعبية قام الصباح مولى العلالش يلقى العلوش يقطع في الروح خلط عليه بالسكينة ذبحو من غير ما يبسمل وعلى غير قبلة وهزو للجزار قال له هاني قصرت عليك التعب وذبحته..
الجزار شاف اللحم مستكحل شك في الحكاية وشراه بالرخص وقال بينو بين روحه كليوناتي ملقحين ضد كل شيء ومشى عمل عليه بلاكة العلوش بعشرة آلاف سمعت جارة الخباز بالحكاية كلمت الخديمة متاعو قالت لها فمه لحم رخيص شرايك تأخذ منو لكلب عرفك قالت لها والله فكرة شرات منه بزايد وعملت بيه كفتة باش تودّ بيها حماتها ياخي شافها الخباز في الكوجينة رخصت نفسه عليها هز منها كعيبات باش يأكلهم في الكوشة.. شوية وجاه رجل الأعمال باش يكمل يعطيه باقي العشرين مليون والخباز كريم مد له صحن الكفتة....
توا نكمل لكم الحكاية بعد ما نتأكد السم حطو الخباز في الباقات ولا في عجين الكرواسون لي باش يمشي لقهاوي اللاك…