عبير موسي : هذي الفيستة اللي تحبو نرجعولها..؟

Photo

البروباغندا متاع الأشخاص المساندين لعبير موسي مركزين على نقطة تتكرر برشا: عبير ما قلبتش الفيستة.. ربما..لكن شني الفيستة هذي اللي يتفوخرو بيها ؟

فيستة حزب الدستور اللي أول إنجاز قام بيه هو الانقلاب على مؤسسيه الأوائل؟ فيستة حزب الدستور اللي مباشرة بعد الاستقلال أنكر دور الفلاقة وحاصرهم وطاردهم وهمشهم وقتل بعض قياداتهم التاريخية ؟

حزب الدستور اللي انقلب على دستور الجمهورية اللي كتبو وأعطى للرئيس صلاحيات ملك بالحكم مدى الحياة ؟ حزب الدستور اللي سمح للزعيم باش يطلق مرتو الأولى من غير عدول ولا بلدية ؟ حزب الدستور اللي عمل ميليشيا تهاجم كل الناشطين السياسيين وتنكل بيهم ؟

حزب الدستور متاع صباط الظلام وبرج الرومي والبوليس السياسي واستفيد ودهاليز الداخلية ؟ حزب الدستور متاع احتفالات عيد الزعيم شهر كامل وأموال ضايعة وطاقات مهدورة ومصالح معطلة من أجل تأليه الأشخاص؟ حزب الدستور متاع الجهويات المقيتة وقت باجة تنتج السكر والمنستير تنتج الوزراء ؟

حزب الدستور متاع محكمة أمن الدولة اللادستورية والمحاكمات الفضيحة للمعارضين؟ حزب الدستور متاع الشعب الدستورية الجهاز الموازي للدولة؟ حزب الدستور متاع تهميش المناطق الداخلية وتركيز هيمنة جزء من الساحل على كل البلد ؟ حزب الدستور متاع سيد الاسياد وثقافة قافلة تسير وتوجيهات الرئيس ؟

حزب الدستور متاع الإعلام المدجن وثلاثة أرباع نشرة الأنباء على الرئيس؟ حزب الدستور متاع الرافل والبوليس يصيح في الكار : عامل يومي ouvrier صوّب لوطا…travolta, beau matin صوّب لوطا..تلميذ، étudiant صوّب لوطا..؟ حزب الدستور متاع الحزب هو الدولة والدولة هي الحزب ؟

حزب الدستور اللي عرفناه كان ولاؤه للزعيم ولهياكل الحزب..ما كانش ولاؤه للجمهورية..هذي الفيستة اللي تحبو نرجعولها..؟

Poster commentaire - أضف تعليقا

أي تعليق مسيء خارجا عن حدود الأخلاق ولا علاقة له بالمقال سيتم حذفه
Tout commentaire injurieux et sans rapport avec l'article sera supprimé.

Commentaires - تعليقات
Pas de commentaires - لا توجد تعليقات