أحمد بالعربي .. طبيب شاب.

دخلت نخدم كطبيب داخلي شاب في مستشفى البشير حمزة عام 2023 .. شاءت الأقدار أنو صارلي كسر في يدي في ماتش كورة بعد خمسة أيام خدمة .. أما للأسف ماتمتعتش بعطلة مرضيّة اللي هي حق و حتى إنسانيا يعني أما قانون المصادقة على التربصات يخيرني بين أنو ناخو stage non validé و إلا نعفس على صحتي و نخدم بما أوتيت من قوة .. .. الحاصيلو اخترت نعفس على صحتي و خدمت 3 شهور كاملين و أنا مجبسّ من مرفقي لصوابعي .. خدمت في ظروف خايبة برشة و كان مطلوب مني عدد حصص استمرار كيما زملائي الكل .. نفس عدد ساعات العمل اليومية و نفس الواجبات ..

وصلت شفت 88 صغير في ليلة من ليالي الڤارد " porte ‘’ الشهيرة في طمبك موسم ال " bronchiolite ‘’ كنت نعدّي على صغير و أمّو تعاوني باش نشدو و إلا نشد الماتريال في الاستعجالي . وصلت خدمت و ال serum معلّق في يدي و نشرب في دوايات الوجيعة ..

كانو والدين الصغيرات يعيطولي '' الطبيب المكسور '' و قداش من مرّة يقولولي كيفاش تاعب و تخدم هكّا ؟ بعيد على دارنا و وحدي في العاصمة .. لا عندي شكون يطيبلي لا يغسلي الماعون لا الدبش لا يهزّ عليّا ساك الڤارد الملغمة بالدبش خاطر نعرف اللي باش نعدّي غربة في الڤارد و نروح كان بعد 33 ساعة خدمة متواصلة و نرجع غدوة كيفكيف ..

ماتمتعتش بعطلة مرضيّة و كنت خايف مال '' fameux stage non validé ‘’ استحملت في صحتي و يشهد الله و صحابي و أساتذتي و المرضى أني خدمت بڤلب و ربّ و أقصى من طاقتي ساعات و قعدت نعاني في مخلفات الشيء هذاكا خاطر يدي مابراتش و عاودت تكسرت بعد 6 شهور فقط و كانت باش توصل لتدخّل جراحي ..

المضحك في الأمر أنو نفس المستشفى اللي عطيتو من صحتّي .. عندو أكثر مالعامين ماخلصتش في حتى مليم من حصص الاستمرار اللي شديتهم .. لا أنا لا صحابي .. التعب و السهر و التخمام و الظروف المترديّة و ماخلصناش في حتى فرنك ..

فيبالكم فلوس كبيرة ؟لا لا .. تي دينار و 500 فرنك على الساعة .

جدّي الله يرحمو كان عندو بهيم حاشاكم يهزّو ساعتين من زمان يجيب عليه الماء مالعين .. يروّح يحطلو بالة ڤرط بخمسطاشنلف .. تطلع ساعة بهيم جدّي ب 7 آلاف و 500 فرنك .

نهاركم زين .

Remarque importante : Mon message ne vise en aucun cas le service ni ma cheffe de service, que je respecte profondément pour son encadrement professionnel et son engagement exemplaire envers l’hôpital public. Mon discours s’adresse à un système , pas aux personnes de valeur qui tentent, chaque jour, de le faire tenir debout.