مرة كتبت على صفحتي الخاصة اني موش باش نعطي حتى تصريح للإعلام وموش باش نعلق على قراراتك خاطر اعتبرت انو المرحلة سياسية بحتة ولاحظت انو في وسط التخميرة الي صارت حتى واحد ماهو مستعد باش يسمع نقاشات قانونية او حتى كان سمعها باش يقبلها. لذا خيرت اني نقعد نتفرج من بعيد ونتكلم في حلقة ضيقة جدا مع العايلة وبعض الأصدقاء المقربين.
سيدي الرئيس؛
- استعملت الفصل 80 من الدستور واعتبرت الي احنا في حالة خطر داهم وانو الدولة تعطلت قلنا ميسالش après tout ما فما حتى سلطة غيرك تنجم تأول الفصل 80 وقلنا ميسالش.
- تجاوزت الفصل 80 وجمدت البرلمان وقت الي هو يلزم يقعد في حالة انعقاد دائم وقلنا ميسالش خاطر "الشعب" فد مالعرك في البرلمان. - عزلت رئيس الحكومة الي انت عينتو ومن غدوة استقال وقت الي صلاحية العزل ما يعطيهالكش الدستور وقلنا ميسالش. Après tout الحكومة فاشلة جدا وتسببت في في خسائر لا تحصى ولا تعد.
- تجاوزت الشرعية ودخلت في المشروعية الشعبية او الشعبوية وقلنا ميسالش après tout "الشعب" او فئة من "الشعب" خرجت تزمر وتغني وفرحانة خاطر ما شافت في الي انت عملتو الكل كان انك رتحتها من النهضة وتعويضات الهاروني. - جاء عيد المرأة وما خذيت حتى إجراء لفائدة المرأة وقلنا ميسالش. المرأة التونسية تفك وما تستناش حتى يعطيوها خاطرها للّات النساء. - صارت إقامات جبرية على أساس أمر 78 الي هو غير دستوري وانت مختص في القانون الدستوري وتعرف. وبدينا نقولو موش ميسالش.
- قلت انو الي يحب على خارطة الطريق يمشي يلوج في كتب الجغرافيا. انا وحدة مالناس نمشي نلوج في كتب التاريخ متاع تونس موش الجغرافيا وانت ادرى بالتاريخ السياسي متاع تونس وما عندي ما نعلّمك. وتزيد تقول انو خارطة الطريق يحطها الشعب. شكونو الشعب الي تحكي عليه ؟
راهو ولينا برشا شعوب وكل فرد من الشعوب هاذي الكل عندو الحق باش يعبر ويتكلم ويكتب. - اما انك في خطابك البارح من جملة 149 فصل في الدستور تجبد بالذات الفصل 6 الي يضمن حرية الضمير والي انا نعتبرو من اهم المكاسب متاع دستور 2014 فهذا غير مسموح بيه سيد الرئيس خاطر مستحيل ومستحيل ومستحيل نرجعو لمربع العنف متاع 2011 والي صار بين الي يحبو على دولة دينية وبين الي يدافعو على مدنية الدولة.
حرية الضمير ما تتمسش ولا رجوع الى الوراء كيف ما قلت انت خاطر وقتها فما شعب آخر باش يقلك لا والف لا !!! الدولة الدينية ما هيش باش ترجع لا مالباب لا مالشباك. تنجم تعلق الدستور تنجم تلغيه اما فما مبادئ دستورية تكتبت بالدم ولا تتباع ولا تتشرى ولعل اهمها في بلادنا حرية الضمير.