السلام عليكم
وصلتني مئات الرسائل و عجزت إني نجاوب كل واحد وحدو. الرسائل أكيد زوز أنواع ، نوع إلي يسأل و متحير و يساند و ونوع إن شاء الله يتعدم ان شاءالله تتيتمو .. نتفهم حرصكم الزوز في الحصول على المعلومة على وضعية رجل الأعمال المافيوزي عبد اللطيف العلوي ، بش تقيمو نتائج الحرب على الفساد أذاكا علاش قررت نهبط ستاتي .
بالنسبة لسؤال شصار ؟
نهار 25 لطيفة العرفاوي )باقتباس مصطلح الأستاذ( Habib Bouajila هجمو علينا شكون يدعو إنهم من تنسيقات قيس سعيد للدار و تهديد و تو نعملولو تو يخزز فالحبس و ... احنا 3 بنات فالدار و بابا كان وقتها sous oxygène (86%) خرجو الجيران دافعو عالدار للصباح و تعدات سلمات الحمدلله. اتصلنا بالأمن و جانا للدار مشكور طمنا و روح . لاحظنا من غدوة إلي الدار مراقبة من ولاد (20 ..25 سنة ) لكن كان الهدف الوحيد بين عينينا إنو صحة بابا تتحسن . (فما كاميرا مسجلة كل شيء في النهج ) .
نهار السبت الصباح ساهرة انا وياه عادي (مقسمين رواحنا فالليل جماعة تعس و جماعة ترقد) الثمنية تع الصباح رقدت مكان فما شيء يوحي إلي هي يمكن آخر مرة نراه عادي قلي بش نحط ماكلة القطاطس و نرقد .
قمت 13h عصوت أمي تلوج عليه ، كل شيء تابعو موجود فالدار دواياتو و مكينة الأكسجين ، طلبناه ميهزش . و بعد جات كراهب حاكم مدخلوش ياقفو قدام الدار يهبطو مالكرهبة و يعاودو يطلعوا.
من نهار إيقاف ياسين العياري و ماهر زيد (الخونة، الإرهابيين. الفساد.رجال الأعمال ( و احنا متحضرين إنهم بش يجونا . لكن قعدو يسألو في صغار الحومة (أقل من 10 سنين) عليه كل مرة يجينا صغير يقلنا راو سألوني تعرفوه الراجل أذاكا و الا لا و برشة أسئلة...
نص الليل غير اربعة جاونا قرابة 30 راجل civil في كرهبة civil قالولنا ندخلو نفتشو و هاو إذن من وكيل جمهورية ، مديت يدي بش ناخذ الإذن نقراه رجعو للملف . ما إهتميتش برشا لحقيقة ، بحكم ربثة مكبشتش اني ناخذو و قتلو أدخل .. انتوما تابعين أي سلك ؟؟ أمن وطني .
للأمانة مالأول بكل احترام دارو فالدار يلوجو لكن بعد شفت des cameras و حلو فيديوات يصورو فينا انا و خواتي ، قتلو معندكش الحق تصور ، قلي لتوثيق العملية ، قتلو حتى توثيق العملية للدار مش وجوهنا ، لكن هوما قعدو حاطين الفيديو لوجوهنا و كي حطيت يدي قلي مناش صحافة إحنا راو عندنا الحق نصورو هكا ، اتصلت ب 4 محامين لكل قالولي معندهم حتى حق يصوروكم .
بالنسبة لسؤال وينو بوك موقف و إلا لا ؟
لا أحنا لا المحامين نجمو يعرفو ، المحامين يدورو على مراكز الإيقاف خاتر عندو دواء دم مينجمش يقص عليه و الأكسجين آخر ليلة قستلو 91 . فيا ريت إذا كان موقف يقولولنا نجيبولو دواه ، مستعدة نحط في كل مركز توقيف باكو دواء المهم يوصلو واحد مالازموش يقص عليه.
إلي يسأل عالتهمة ؟
قضية المطار s17 ( إلي المرا إلي دافع علاها سيف ليوم تحوس و مثبتت ضدها حتى تهمة كيما يروجو ) تفتح فيها حكم عند قاضي التحقيق و متجبدش بابا و معيطلوش القضاء المدني و القضية ماخذة مجراها عادي مدنيين قدام قضاء مدني في قضية مدنية لا فاها جيش لا عسكر .
نفس القضية هاذي بشهادة الأستاذ Samir Ben Amor "تسارع سلطة الانقلاب في آخر الليل إلى حث إحدى النقابات الامنية على إيداع شكاية ضد نواب ائتلاف الكرامة تتعلق بحادثة المطار التي تعهد بها القضاء العادي منذ شهر أفريل الماضي، و يتم فتح المحكمة العسكرية خارج التوقيت الإداري حوالي منتصف الليل، و يتم تضمين الشكاية فورا، و يتم فتح بحث تحقيقي و إصدار انابة عدلية للباحث بعد منتصف الليل و يتم الشروع فورا في سماع النقابيين الأمنيين و تواصلت السماعات إلى غاية الصباح و في الصباح تتنقل الفرقة إلى محكمة منوبة لانتظار ماهر زيد و اعتقال ب الاعتماد و شكاية منتصف الليل " و تولي قضية عسكرية ، فرسالة اساتذتي فالقانون، مبدأ سابقية التعهد تنجمو تلغيوهولنا من الكور ، غير معمول به.
الفصل القانوني اساس الدعوى حسب المحامين : الفصل 72 م ج "يعاقب بالإعدام مرتكب الاعتداء المقصود منه تبديل هيئة الدولة أو حمل السكان على مهاجمة بعضهم بعضا بالسلاح وإثارة الهرج والقتل والسلب بالتراب التونسي"
هذا الفصل القانوني بش يتحاكمو بيه نواب ائتلاف الكرامة . قدام قضاء عسكري الي صارت فيه التغييرات و الإقالات في إطار تصحيح المسار .
علاش نكتب في هذا لكل كسرتلهم ريوسكم ؟ عندكم حق الزيت موجود و نعمة بالله .
كتبتو بش نوضح للي سألوني صحيح ، لكن بش نوصل بعض رسائل للتاريخ . (خاتر نؤمن بفكرة إلي الفايسبوك فالمستقبل بش يولي متحف تاريخي ينظموه المؤرخين و يجيو صغارنا يتفرجو في الوقائع و المواقف .. يتفرجو في كمنتاراتكم يا فضيحتكم ) :
1- الف قبلة على جبين احرار تونس ، مثقفي تونس إلي عايشوا الإستبداد و يعرفو شمعناها تجميع سلطات في يد شخص واحد ، إلي طبعو بصمتهم في تاريخ البلاد. ألف قبلة على جبين الأساتذة جوهر بن مبارك ، نجيب و عصام الشابي ، الحبيب بوعجيلة ، المرزوقي ، حمة الهمامي ، راضية النصراوي ،حمادي الرحماني، احمد الغيلوفي ، الأمين البوعزيزي .،عماد الدايمي، عياض بن عاشور ، الخال عمار الجماعي ،زياد الهاني ، أبو يعرب المرزوقي و برشأ اسامي .. كل الأحرار إلي مخافوش ،إنتوما النخبة مش بشهاداتكم العلمية كهو ، لكن بتاريخكم و بثقافتكم الحقوقية و قيمكم الإنسانية و نفسكم الثوري . كل كلمة منكم قوة لعايلاتهم و كل لا للإنقلاب منكم أمل لينا . انتوما روح هالبلاد و بش تتعافى بيكم .
عنِ النَّبي صلَّى اللهُ عليه وسلَّم قال: " أفضلُ الجهادِ كلمةُ عدلٍ .."
2 -لعايلات و صغار نواب إئتلاف الكرامة وولد ياسين العياري ( إلي شواني في بابا لكن نسامحو) ، ريوسكم عالية لفوق انتوما فديتو بلادكم ، دعوتكم ديما "ربنا إن عم الظلم فإجعلنا من المظلومين و لا تجعلنا من الظالمين و حسبنا الله و نعم الوكيل" افتخرو بكل كلمة حق خرجت من فم الوالد ، بكل مرة رماو رواحهم في محرقة على خاتر ثورة الشعب و كرامة ، بلهفتهم عالحق وجعوا برشا و عماولهم قلوبهم و خرجولهم أسوء ما فيهم ، قهروهم كي علو صوتهم ضد الفساد النقابي ، ضد التدخل الخارجي ، ضد الإجراء الحدودي الغير دستوري ، ضد استباحة مؤسسات الدولة ، وجعوهم عامين ياخي إستباحو أعراضهم بكل أنواع الإشاعات.
نوابنا من اول نهار فالمجلس دخلو و هوما عارفين إلي هوما قاعدين ينتحرو بالشوي على خاتر كرامة الشعب. نقلكم نعرف إلي انتوما خايفين، لكن هذي سنة الحياة ، من سورة البقرة ربي حط قدامنا الصراع مع الأمر الواقع المر ، ما كذبش علينا و صدمنا من غير تجمييل حكالنا عالكوارث الطبيعية وغير الطبيعية؛ ظلم واستبداد واغتصاب وقتل وسفك للدماء و حروب...و لآخر سورة فيها التعوذ من الناس ... هذه هي سنة الحياة و "بشر الصابرين "
3- باعتبار إنو أسوء سيناريو يصير إنو المحاكمة تبقى عسكرية و يتطبق عليهم فصل الإعدام ،(مبروك للتوانسة طالبتو بتطبيق الإعدام ضد مغتصب رحمة ؛ لكن هاو يمكن يتطبق ضد العلوي) ، لكن كي خممت فاها مهوش خايب لهالدرجة . يعني إذا كان سال دم نواب إئتلاف الكرامة و تحكم عليهم بالإعدام في القضية العسكرية و تلوحت المدنية ؟ تشبعو عطشكم ؟ سي هيكل المكي بربي جواب ؟ سي لطفي العماري ، مادام عبير ، ؟ سي هشام العجبوني ؟ سي نبيل الحاجي ؟ مسيو و مادام عبو تشبعو ؟ سي سالم الأبيض؟ أستاذ محفوظ ؟ الأستاذة ليلى تع شهادة الزور ... بربي جاوبوني ، كان جوابكم أي، فنعمة بالله إن شاءالله فداء هالبلاد و يرجع الشعب يسامح روحو و تعنق الناس بعضها و يفيقو من الدمغجة إلي صارتلهم سنين ، الشعب إلي يضربو فيه المثل في عدم قيام حرب أهلية و في التعددية و الديمقراطية . إن شاء الله
شنوة بقى ؟ حقهم هوما؟ حق عائلاتهم ، بش نحاربو عليه لآخر نفس نتبرعو بيه للآخرة ، وقتها مفماش تعيينات و ولاءات مع الله العدل الحق و عند الله تلتقي الخصوم .
4 - لفخامته رئيس الجمهورية قيس سعيد ،نطمنك مندمناش ،خاتر وقتها انتخبنا إلي شفنا فيه روح الثورة ، إلي قال التطبيع خيانة عظمى ، إلي كان قبل ما يولي رئيس كي يظهر فالإعلام يدافع عالدستور و ينتقد إلي يتعدو الدستور ،. مغير ما يوقفو حد و إلا يسكتو ، نكذبش عليك ريناش فيك دكتاتور . بابا إلي قلت إنك تقرالو كتباتو ، إلي اقنعوك إنو عدوك ، عمرو ما خرج في إحياء عيد ثورة و إلا اي احتفال إنتخابي ، خرج كي ربحت انت و يعطي فالتصريحات للقنوات بالعلم على أكتافو في شارع الحبيب بورقيبة و يقول ليوم اطمأنينا عالديمقراطية ، إلي باتو يبكو نهار فوزك ، انتصرتلهم ليوم .. و إلي عطاوك الأمانة ؛ خنتهم ، خنت الأمانة سيد الرئيس. ( عمري ما تصورت روحي نكتب بعد الثورة و انا نخمم يمشوش يوقفوني ) .
هو حتى مديرة ديوانك ، الأستاذة نادية عكاشة ، حصلي الشرف كنت من طلبتها و مغبتش علاها حصة محسيناش فيها إلي قالوه فيها .. بلعكس كان مقربة برشا لصاحبتي و كانت ديمقراطية ، حقوقية ، المهم، مادام إن شاءالله تكون مزلت ،خاتر الحقوقي يرفض المحاكمات العسكرية، يرفض تلفيق التهم ، يرفض غناية بصوت إلي باركت مجزرة قتلت صغار في بلد شقيق .
5 _لشعب الفايسبوك ) منيش نحكي مع جيل الهاها و ال(up اتقوا الله في بلادكم و إتقوا الله في كلامكم ، اقروا تحاليل و قراءات الأساتذة مهما كان موقفكم ، أقروا للي يحبو يفيقوكم من التخميرة ، إلي يعطيوكم في قراءات إقليمية قانونية حقوقية دستورية ، و بعد عبرو و اتقو الله في كسر الخواطر : بنت العفاس و مرتو محلوش فيديو يتذللوكم و إلي يستعطفوكم .. لااا خاتر عميت القلوب، حلوه ينقلولكم ..،كيف كيف مرت العياري و اختو ، الحقد عماكم ، كي يقراو الي كتبتوه ... )أختي الصغيرة تقرى و تقول اهوا يا ربي و هذا ( المهم الله يقويهم.
حد ما ينجم يردكم ماكينات بلا قلب ، هاذم اعدائكم الي خرجتو في كراهبكم تزمرو ضدهم ؟ (عذكر التزمير ندعو لتقديم مشروع قانون لإلغاء الإنتخابات و نولو كل عامين نخرجو نزمرو ، الي يزمر أكثر يربح ) باهي و علاش أعدائكم؟ علاش خاتر ممشاوش معاكم نفس الموجة ، باهي ميسالش قولو ثورة ، الثورات تكون في لحظات الوعي مش الدمغجة و السبات ، تصطفوا فيهم وراء المثقفين (و مش عيب و إلا إنقاص من قيمة حد ، خوذو الثورة الفرنسية مثال ) .
و السؤال هو هل إنو جيل واحد ينجم يكون شاهد على زوز ثورات حقيقة صادقة؟ لا ... هل ثورة 11 جانفي 2011 ماكانتش حقيقية صادقة ؟؟ ثورة قطعت مع القمع و الاستبداد ، ثورة الحرية ( تنجموا تجاوبو (
6- اخر رسالة لبابا ، :"هل جزاء الإحسان إلا الإحسان " منعرفش كان شتقرى كلامي ، اما فما برشا كلام مقلناهوكش ، نحبوك قد الدنيا و فخورين بيك لآخر نفس ، توحشناك برشا بلاصتك فالدار قد الدنيا حتى القطاطس ميقعدو كان عالبنك متاعك ، أنا متأكدة إلي انت متوحشنا زادة (خاصة انا ) و ميسالش توحشنا أما متتحيرش علينا ، كيما علمتنا ريوسنا عالية و قويين احنا ظهرك و انت ظهرنا ، السجن السياسي عشتو في وقت بورقيبة و بن علي ، مكش بش تخاف منو توا ، كتاباتك اترجمت للغات اخرى و تنشرت فالعالم و بش تشهد عليك إنك بقلم حاربت الظلم و الإستبداد و العمالة و الإرهاب و عمرها اكيد اطول من عمر كل من قال فيك كلمة ،
ندعولك ديما و كان تشوف دعاء الخير و شهادات الناس إلي عاونتهم ، إحنا ربي هبط في قلوبنا الصبر بابا والله واقفين و قويبن إيماننا بربي قوي و إن شاءالله إنت زادة تكون بنفس القوة راك جبل يا بابا . و انا متأكدة إلي انت بش ترجعلنا سالم ، لكن لو شاء ربي و ظلموك بسنين حبس ، ربي فوقنا و فوقهم و لا حول و لا قوة إلا به ونحاربو عالحق لآخر دقيقة و لو شاء ربي اختار روحك لتونس ، ماكش خير من آلاف الي سقاو الأرض بدمهم ..خليهم يزيدو يغرقو بصمتك فالتاريخ و نزيدو إحنا نفتخرو بيك و تكون إنت بحذا عمي تميم نعرف قداش توحشتو .
نحبوك برشا و عيشك على كل شيء إلي خلطت تعملهولنا و إلي مخلطش نعرفو إلي انت حاولت.
كون قوي بربي و "لا تقنطوا من رحمة الله "