نهضاوي/ خوانجي

تو الرهط هذا متاع واحد نهضاوي يارسول الله؟ هم بوقوسات علي ومتربيين في النعيم.

تنقد الاتحاد نهضاوي تنقد الاعلام نهضاوي تنقد عبير نهضاوي تنقد النقابة متاعك نهضاوي تنقد اليسار نهضاوي تنقد التيار نهضاوي تنقد الشعب نهضاوي تنقد قيس نهضاوي.. تنقد حفتر نهضاوي تنقد السيسي نهضاوي تنقد النهضة " نهضاوي اما يتلّف في الجُرّة"..

الغريب وقت كنت مع قيس ضد القروي قالولي نهضاوي ايضا،ساعتها قيس سلفي يصور مع رضا بالحاج وضد المساواة في الارث ومن يسانده ما يكون كان نهضاوي، وهم ساعتها مع الزبيدي ومع القروي ..

تعرفوها حكاية " ڤول اني ارنب؟" ثم رئيس ڤال للمخابرات متاعه في الليل تو تجيبولي ارنب. مشوا لوجوا ما لقوش، ولكن طاحوا بڤطوس معاق، بدوا يعذبوا فيه ويڤولوله " ڤول اني ارنب".

ولكن عندي سؤال " نقدي" بالمعنى الكانطي: ياخي ça y est تفاهمنا على انه النهضاوي حاجة خايبة؟ يعني ماهي شروط امكان اعتبار " خوانجي" حاجة خايبة؟ هو اختراق ما انتجته اجهزة البوليس العربية للدماغ العربي المقهور. وانا لم تخترقني دعاية البوليس العربي ولست مقهورا. والحمد والشكر يعود لله وللفلسفة: اهم وصفة علاجية ووقائية انتجها الانسان.

الحاصيلو امر الله يقضيه الله.

Commentaires - تعليقات
Pas de commentaires - لا توجد تعليقات