جماعة النهضة

Photo

اندثر النداء ولم تبق غير فلول،ونحن في لحظة شبيهة ب 2011 لذلك سنبدأ في توجيه النقد لمن يستحقه لعلنا نسارع في تدارك ما افسده التكتيك والميكماك. جماعة النهضة سيبوا الدنيا الكل: الكورونا والفقر والفساد والمهربين والمحتكرين والوردانين وكبّشوا في قيس سعيّد. الراجل يقول لهم فلوس الشعب وينها؟

أنتم من كان يحكم من 2011 الي 2019. أنتم من كان إما في المرتبه الاولى ام في الثانية. أنتم من كان وافق على قانون المصالحة ومن كانت هيئة بن سدرين تعمل تحت انظاركم: ماذا دخل لخزينة الدولة من كل الاموال المنهوبة؟ لا تقل لي اكراهات وارهاب وإقصاء..السياسة بالنتائج.وهل كنتم تريدون ممارسة السياسة في عالم بلا اكراهات؟

طيب اليوم النداء غير موجود واليسار الاستئصالي اندثر من عالم السياسة ومعكم في الحكم قوميين ويسار اجتماعي ومعكم في البرلمان جماعة الكرامة والقروي صبعه تحت الضرس وعندكم رئاسة المجلس: عوض تحاربوا قيس سعيد وتجروا في جرة جماعة الفايسبوك ترا راجعوا قانون المصالحة؟ راجعوا المسار الفاسد للعداله الانتقالية؟ رجعوا فلوس الشعب من الخارج ومن سراق الداخل؟سيطروا على ثروات البلاد؟ اعملوا خزانات قمح باش كيف تجينا صابا نخزنوها موش نطيشوها ونستوردوا من فرانسا كل عام؟

اشبيكم ما قدمتوش المكي لرئاسة الحكومة عوض الجملي؟ المكي الي شركاءكم موافقين عليه تو راهي عندكم رئاسة الحكومة. وقت كان الباجي كنتم تدافعون عنه بأسنانكم واليوم مشكلتكم قيس سعيد. اذا كنتم تخافون اللوبيات خلوا الراجل يفارعهم. اما عندما تهاجمونه تصبحون في صف اللوبيات.

التفويض: دائما في اذهانكم حاجة عملتلكم تروماتيزم: لو كان ياقع انقلاب علينا الشعب تو يخلينا كيما عام 90. اولا: إذا تبقوا على الخط هذا اظن الشعب سوف ينقلب عليكم لأنكم اصبحتم عقبه. ثانيا: بربي ياخي الضامن للديمقراطية الشعب ام مجلس نواب شطره كناطريه؟ ثم الشعب هو الي جابكم وجاب الديمقراطية والا العكس؟

اسمعني أنى راني نفهم كيما بواندم: الضامن الوحيد الموثوق لديكم هو الفساد. تسكتوا عليه يسكت عليكم. وبالطبيعة القوى الخارجية. واصلوا اخدموا هاضوما الاثنين لوكان ينفعوا راهم نفعوا بن علي.

وراني عارف الرد متاعكم شنوه: " العنتريات..والحماسة والثورجية..ولابد من العقل " كأن من يطالب بحق مسلوب هو مجنون. ثم الكلام هذا راهو نفس كلام الحسن الثاني وبورقيبة ومبارك والملك حسين..الحاصيلوا واصلوا على هذا المنوال.

ملاحظة: عارف من هنا فصاعدا باش نولي يساري استئصالي متنكر؛ علماني حداثي مُتستٌر.

Commentaires - تعليقات
Pas de commentaires - لا توجد تعليقات