خليك ذكي عاد كي تبدا تترهدن..على خاطر ثمه ناس لتوه ولغدوة ما عندهم حتى مشكل لا أخلاقي ولا إجرائي مع الظلم.. هم مع النظام القائم وفي أعماق أعماقهم يتلذّذ ذلك الجانب المرضي في شخصيتهم، بكل أنواع الإذلال والانتهاكات التي تُمارس ضد من يختلف عنهم في أفكاره أو مواقفه..
أما هاونم يبدو يتلفو في الجرة كي الناس لكل تحشرت في زاوية حادة.. ومعادش ثمه حتى مجال لتبرير وانتهت كل الكذبات.. أما ساعات تنجم تحندرهم بقلوب مزروعة نهار وليل في الصفحة الرسمية أو ببعض بقايا الحنطة في صفحات المدّاحين الصادقين.
عاد يبدا لاعبها موش عاجبو الوضع، أما يبدا يتمرّغ من تحت لتحت..
وكل مرة يختلق في الأسباب الواهية و يلوي عنق الحقيقة ليشتري عذرية جديدة في مزاد "الانحياز الإنساني" الذي تحوّل الى نصبة في سوق لربعاء، يفرز منو كان المنسجم مع أفكاره.. يعني يحب يقول راهي إنسانيتي تحضر وتغيب كي الرجلة بالضبط والمواقف والمبدأ ..وموش مهم ينتهك خصمك الفكري أو ينكّل به المهم جماعتنا لاباس!!!
و إلا يبدا يسبّ في المعارضة و نازل فيها ركبة، إي مالا ماهي المعارضة هي البهيم القصيّر، اللي يجي ياخذ فيها باي، وعارفها ما تنجم تعمل شي.. ويعرف هو باش مستقوي.. حتى على الأقل وكان جاء نقد بناء يقدّم بالأفكار.. أما هو تهذريب متاع دس السم في الدسم للمحافظة على شعرة معاوية مع النظام…والا يبدا يتشرط هذوكا ما نهبطش معاهم على أساس هذوكا كرّاية معاك والا انت مسكنهم عندك على وجه الفضل!
فيق.. هذوكا ولخرين وكل بشر حامل جنسية ها لبلاد هو كيفك رغم انفك، والأغلب اصدق منك وخير منك، على الأقل موش سافل كيفك!! .. من حقه يكون عنده راي وموقف في بلاده كيفك كيفو.. يعجبك والا لا باش عجبك!!
مكاش عامل "ابارتايد" وحدك وتفرق فيه في صكوك الانتماء للوطن، وكان ريح الاستبداد مواتية معاك توه.. فتلك أيام نداولها بين الناس.. وأنت ليوم رجليك في الركاب غدوة تنجم تكون تحت الرجلين أصلا!!
لحقيقة برشه ناس عاطيه حجم لأرواحها اكبر من حجمها وهي الحڨرة اللي عايشة فيها "الهوش" يزوّك منها ..
لا والناس قاعدة تموت بسبب جريمة هو شريك اصلي فيها و هو ما زال ينجم يلقى في روحو بقايا وقاحة باش يفتي ويفسّر ويشرح ويحللّ !!