الحق على من تخلّى عن حقه و جعلتم منه متسوّلا في وطنه يستنى تتبرعولو ب"كوانز الدجاج" في رمضان و بكتف علوش في العيد.. وتتمزّو عليه من فوق!!
ماهو وكان خدمت خدمتك انت واللي حطّك في البلاصة هذيكا وكنت في مستوى الكرسي اللي قاعدة عليه واللي ظهر كبير عليك برشه.. راهي الناس موش تستنّى في "زكاة راجلك" باش يعيّدو!! راهم الناس معيدة بكرامتها وقدرها موش "النطيحة والعرجاء و ما تركت السباع" ترشق عليهم في حقهم!!
بربي علّموا أولادكم عدم القبول بالإذلال، علموهم اش معناها كرامة واش معناها تاخذ حقك من غير ما تتمرغد في التراب واطيح خشمك للي يسوى واللي ما يسواش...
الفقر موش عيب.. العيب والجريمة الكبرى كي تربّي كائن منزوع الكرامة والعيب انك تسكت على حقك وتقبل بفتات المائدة ..نعرف ناس تنجم تكون معندهاش عشاء ليلة اما الخشم ديما في السما و كرامتهم قبل حياتهم.
معندكش سوم علوش ما تشريش.. اما رد بالك يشوفك صغيرك مذلول على زوز كيلو لحم.. باش تموتو كي ما تعيّدوش.. في بلاصة تمشي تتسلف أو تخليهم يصدّقو عليك ويذلّوك.. فهّم صغارك علاش انت لا تنجم تعيّد، لا تصيّف ولا تشري حتى الغلة ..
يزي من اجيال الذلّ !
هلكتونا بالرخص.