كثرت أمس الفيدوات والتحليلات "الجيوبوليتيك" حول :" ماذا حدث ليلة 14 جانفي ؟! " ..وكلّ واحد عامل فيها عارف الأسرار وفاهم المؤامرة ومنطلع على الكواليس ..وهات يا "حقائق" ! وكل واحد يستشهد بفلان وفلتان وفمة شكون حتى جايب بنت "بن عليّ" باش تحكي بهاك الميوعة اللّي تعجن في فرنسوية على عربية من غير ماتقول شي .. الحاصل هاهي طلعت النّاس الكلّ عارفة ومتيكّدة اللي "ريّس لبلاد" تعرّض لمؤامرة أمريكو طليانية !! ..إذن لا ثورة لا حموم أيّام !!
هيا يا سيدي خلّي ها التهثريم متاع "المعيز " على شيرة وتعالى نقولك إيش صار بالضّبط : صار أنو شعب فدّ وكره العيشة وكره البلاد وريّس لبلاد وهو بارك على مذهب بوهم ثلاثة وعشرين عام وناوي يكمّل ..كره عصابة نهب وين يتذكر فساد تلقى لقب "الطرابلسي " فيها ، ناس كلتها البطالة والحاجة والفقر ..هاكة علاش أوّل شعار ترفع هو :" التشغيل استحقاق يا عصابة السرّاق "!
صار أنّو نظام تهرّى بالخيارات البورقيبية المتناقضة وكمّل عليها الجنرال الأبكم بالقبضة البوليسية وصارت بلاد كاملة تشكي لربّي بعد فشل كلّ محاولة تنفيس ! صار أنّو السيستام كلاه السّوس من جشع أصحابه ورغبتهم في الإثراء السريع فظهرت "صناديق سامي الفهري " و"التذكرة الأخيرة " وكول بايك قبل لا يأكله غيرك ..! صار أنّو تسكّرت الأفام الكل وكلّ كلمة ولت محسوبة وكلّ واحد مانعرفوشي نقولي :" اس ..هذاكة بوليس "!!
ردّوا بالكم تصدقوا هاك المحللين بو دورو اللي زعمة زعمة آباء المفهومية ويقولك :" بن عليّ" نبز وزيرة الامريكان ياخي انتقموا منه "! او يقولك :" راهو صار انقلاب داخلي من رشيد عمار لحساب جهة ما " أو يقولك :" راهو جبدوا بيه باش يتخلصوا من جناح ليلى بن عليّ "! او يقولك :" بن علي كان ناوي ينسحب من 2009 غير ضغطوا عليه "! ..إلّي تسمعه يقول هذا قوله :" مؤخرتك !" أقسم بالله كان لقوا لكلّهم كيفاش يبقى بن علي في الحكم حتى مسنّدينه على خشبة راهم شدّوا فيه إمّالة " الكرطوش الحي لواش يستعملوا فيه ؟!" ..بكلّهم ساعتها عارفين ساعة الحساب وصلت وخايفين على روسهم ..
شوف ولد أختي، ما تاخذ راي حدّ ..إلّي صار في 14 جانفي أنّ الشعب اللّي حڨروه قعّد السيستام ورأس السيستام على خازوق !
قف انتهى …