وحق ربي أنا كي قريت قراءة د.رضا الشكندالي لهاكا الفصل متاع "السيارة العائلية" حشمت في بلاصة الرقع متاع ها الرقعة الجغرافية اللي م البارح وهم ناصبين زكرة بريّك على حكاية متاع تدغيف وضحك على الذقون عيني عينك!
طبعا سي رضا الشكندالي قيمة وقامة في المجال الاقتصادي لا يرقي لها شكّ عمل قراءة هادئة بعيدا عن الشعوذة والتثعليب والغمّة متاع العادة واعلف يالي معلفتش.. أما أنا اللي بهتني هو فرحة البلهاء.. آحليلي لها الدرجة انعدم الاحساس.. يعني واحد يبيع ليك في الوهم عيني عيني ويدغّف فيك ومعڨّبها عليك دنيا وآخرة وأنت شايخ في مخك وترڨص بحذا نافورة!!
تي على الأقل الواحد تغيضو روحو.. يقول بينو وبين نفسو علاش وليت مسخرة كل مسؤول.. أنا نمنّ بحق كل بشر في قدر من الغباء والبهامة اما يا أخي منستوعبش واحد عاملينو مسخرة وزيد فرحان.. لا والبنة فين ثمة جماعة كي تحصرو في تركينة، جيبدو كالعادة اللوبيات وقالك، "لوبي لكراهب" حرم المواتن ساحبي .
بصرف النظر عن لوبي الكراهب اللي هو لوبي زوالي حدّو تحتريف من ورا الدولة في لكراهب الشعبية، تي كان عندو نواب في "برلمان التوافق وما عمل شي" - هذا بالنسبة لثوار خمسوعشرين اللي اكتشفو أن الارض مسطحة وفيها لوبيات- عاد قلنا اللوبي هذا راهو حتى شي مقارنة بلوبيات اقتصاد الريع الصحاح واللي ما تمسّ فيهم حتى راس. اي ما يسالش نعرفو لكلو رحيان كلام وطاحونة هواء ادور في الفارغ..
أما يا أخي ها اللوبي هذا على فرض تقوّى واشتسرس توه، ياخي تقوّى على اشكون، ماهو تقوّى على من يحكم.. وكي أنت تبدا تحكم وموش منجمّ تغلب ها اللوبيات.. وقتها العيب في اشكون.. فيك لأنك فاشل والا في اللوبيات على خاطرها قوية .