هاوْ من توّ، وهاذي وصية وسع.

الفدرالي الأمريكي هبّط في نسب الفايدة بــ 25 نقطة (لعدّة أسباب). وهذا بش يكون عندو تأثير على سعر الصرف في الأجل القصير (موش لازم ندخلو في التفاصيل): معناها يُمكن الدُّولار يزيد يطيح بالنسبة لليورو... وبطريقة غير مباشرة بش يطيح بالنسبة للدّينار،

يعني الدولار الأمريكي، هو والعُــملات المربوطة بيه الكل (الدينار الأردني، والريال السعودي، والدرهم الإماراتي، ...). لا تقُلّي سياسة البنك المركزي متاعنا ولا حتى شيء…

علاش الدينار بش يطلع في الأجل القصير ميكانيكيا بالنسبة لأغلب العُملات المربوطة بالدولار بعد ما الفدرالي الأمريكي هبّــط في سعر الفايدة بــ25 نقطة ؟

فمّه زوز أسباب مُــهمّة:

1- سبب منطقي، وتابع الانتقالية (Transivité) كأبسط شكل للعلاقة المثلثية (triangulaire)، لكن هذا لازم وموش كافي، اذا كان البنوك المركزية متاع بلدان العُملات هاذي ما يتفاعلوش مع سياسة الفدرالي الأمريكي.

2- السبب اللي هو كافي، أنّو البنوك المركزية متاع العملات المربوطة بالدولار تزيد تهبّط في نسبة الفايدة متاعها بش تحافظ على نفس تعادل أسعار الفائدة (Parité) وزيدْ بش تتجنّب خروج راس المال (المالي) من بُلدانها على خاطر اعظمهم أسواق المالية متاعهم مفتوحة.

معناها البارح كيف البنك المركزي الإماراتي هبّط بالضبط 25 نقطة من نسبة الفايدة متاعو، موش يلعب.