يا ربي راهو الواحد باش يقطّع شعرو مالعوج! تي كون زقفوني شعبوي رث بالفمّ والملا وقول أحمد صواب معارض لمشروع إنقاذ الإنسانية على يد سعيّد وعلى هذاكا يستاهل الحبس مدى الحياة، والا كون وطدي دنيء(على شاكلة الجمهور الوطدي اللي شنّع على الرحوي البارح لمجرد أنه أدان اعتقال صواب في لحظة توتر) وقول راهو يستاهل الإعدام خاطرو يدافع على بشير العكرمي اللي رفض إدانة النهضة باغتيال بلعيد.. ، والا ضمّ فمك!
أما تبدا تتزلبط وتتعلوك كي تحية كاريوكا (اسم راقصة مصرية محترمة ومناضلة.. وتتقن الرقص الشرقي اللي يتطلب التعلويك) وتقول اللي أنت متقلق برشا من توجيه تهمة إرهابية مبالغ فيها لسي أحمد صواب... آاااما متقلق أكثر من تحويل سيد أحمد إلى أيقونة ثورة وكائن خرافي وزعيم عالمي!!!
يا سخطة يا همّ يا زلبوط يا آش باش يقول فمي.. ما كادكش حرمان إنسان مواطن من حريتو وانتزاعو من حياتو الطبيعية وسط عائلتو وأهلو ومنعو من خدمتو مورد رزقو ومصدر كرامتو... وكادك برشا أن يقال عنه أنه أيقونة!!!
تي أيقونة وزعيم واستثنائي بالسيف على فارينتك! والا بالكش غاير وتحبنا نعملوك أنت أيقونة!؟ برا يا سيدي هانا حطيناك أيقونة.. أما في "رقصة الطاحونة"!