"نكرة"

نستعملْ كلمة "نكرة" وفق المجال: نكرة في السياسة، معناها لا عندو رصيد ولا عندو برامج تفيد العباد ولا هو يرتقي الى متوسط المستوى "المفروض" متاع التوانسة. نكرة في الفنّ، معناها بعيد ياسر. اذا غناء فيه نشاز، واذا شعر ما تعرفش تفرّق بين الحديث العادي متاع الناس والشعر متاعو. نكرة في "الخبرة" معناها ضعيف في القراية واللاّ موش مالميدان اللي يتحدّث فيه.

تصوّروا كان كل تونسي يقترح على صحابو واولادو واولاد حومتو، بش كل مرّة يلقى خبر ما يهمّوش يبطل ما يتبّعوش، ويعمل ما في وسعو بش ما يتبّعوش- يمشي يعمل حاجة أخرى، ينظّم بيروه واللاّ يسئل على صديق، واللاّ يمشي يعمل فوتيغ، وللا يمشي لولدو يشوف جدول الأوقات متاعو واللا لبنتو يعلّمها حاجة جديدة في حياتها، واللاّ يعمل كيما قبل كيف كانوا يقصّوا على "التور دو فرونس" ويحطّوا "بيشة وفرهود"، واللاّ يقصّوا على جنازة الزعيم بورقيبة ويحطّوا برنامج الحيوانات والدبّ الأبيض في القطب الشمالي كيفاش يعيش…

البرامج هاذي كيما مثلا،


• حقّ الرّدّ متاع الرابور (نكرة رقم1) على "الكلاش" متاع الرابور (نكرة رقم2).

• حقّ الردّ متاع الانتستاغراموز (نكرة 3) على الانستاغراموز (نكرة 4).

• الجديد متاع الفنّانة (نكرة رقم 5) على الجديد متاع الفنّانة (نكرة رقم 6) .

• التصريح الفارغ متاع السياسي (نكرة 7) على السياسي (نكرة 8 ).

• حقّ الردّ متاع السياسي (نكرة 9) على التصريح متاع السياسي (نكرة 7).

• تصريح متاع مسؤول (نكرة رقم 10) على بابور جايب التاي والكاكاوية من الهند والسند وقعد في البُرط جمعتين ورجع.

• تحليل متاع عالم في الدين (نكرة رقم 11) فيما يخصّ هل أنو البخاري صحيح واللاّ غالط.

• ردّ فعل متاع عالم في الدين (نكرة رقم 12) على موضوع البخاري صحيح واللا غالط.

• تشخيص للوضع الاقتصادي من عند خبير اقتصادي، متخرّج من جامعة تحت الصور (نكرة رقم 13) .

• خبر على مسرحية من طرف "صحفي" (نكرة رقم 14) ما يخصّش لا النص ولا السيناريو والإخراج ولا الموسيقى الخلفية متاع المسرحية، لكن يتعلّق بقداش جاو من ناس للمسرحية وعلاش روّحوا.

• حوار فارغ ميكروتروتوار متاع صحفية (نكرة 15) مع (نكرات 16) في شارع الحبيب بورقيبة.

• برنامج في احدى الإذاعات المحلية (نكرة 17) في شكل استنطاق بوليسي مع الضيف…

تصوروا كان التوانسة يبطلوا ماعادش يتبّعوا البرامج هاذي، صحيح نسبة البطالة متاع "الإعلاميين" موش بش تأثّر برشة في نسبة البطالة الموجودة حاليا، لكن:

شفتوا قدّاش من نوع متاع نكرات موجودة في البلاد؟ يعني اذا كان من كل نوع فمّه عشرة، معناها 15x10=150 نكرة نسمعوا فيهم وارّاو فيهم كل يوم لمدّة 10 سنين. وايذا كان في النهار ساعة أكاهو، يعني 150x365x10= 547500 ساعة.

547500 ساعة، يكفيوا باش واحد يولّي بطل في عدو المسافات الطويلة، وأفضل شاعر، وأفضل بطل في المصارعة الرومانية، وأفضل سبّاح في اختصاص الفراشة، وأفضل تلميذ في القراية، وأفضل جيل. واللي مغروم بالسياحة ينجّم يدور البلاد الكل، واللي مغروم بالمطالعة يمكنلو بش يكمّل الكلاسيكسات الكل، واللي مغروم بالدين ينجّم يحفظ القرآن والانجيل، واللي يحبّ يولّي ماليسار، يقرى ماركس وانجلس ولينين ويزيد هيجل وفيورباخ اذا يحب، ويذا قومي يمكنلو بش يطّلع على السبعة أجزاء متاع عصمت سيف الدولة وباقي عندو الوقت …

Commentaires - تعليقات
Pas de commentaires - لا توجد تعليقات