نحب نعرف شنوه الفرق وشنوة العوامل المشتركة بين الغناية الفارغة متاع "ميقالو" على "عبير موسى"، وبين "التكوميك متاع "عبير موسى على شفطر"، وبين اللي "يختار المستبدّ الوطني على الديموقراطي العميل" وبين "المداخلات الإعلامية متاع شفطر اللي لا تخضع لمنطق ولا علم ولا مستوى واللي هي اقرب للهراء"،
وبين "التصريحات السطحية والفارغة والانتهازية متاع عماد الحمامي"، وبين "الرقص الفاضح والهبوط الأخلاقي في مهرجان المولد النبوي بالقيروان"، وبين "التصريحات متاع بعض المعارضة متاع "بجرّة قلم" و"دعوة للرئيس الى تطبيق الفصل 80 ونشر القوات العسكرية" وبين "مسرحيات لطفي العبدلي اللي بينها وبين الادبيات المسرحية سنوات ضوئية" وبين "تحاليل متاع أستاذ جامعي اللي يقول اللي هو عمل برشة مقالات على الحوكمة ولازم مجلس الإدارة متاع الشركات الاهلية يكون فيها المرأة"، وبين تصريح شكري بوزيان أنّو "عبير أمّو"، وبين برنامج "سكّر البرنامج الهابط جدّا"....
شخصيا ما ارّى حتى فرق، لكن فمّه قواسم مشتركة اللي هي:
- التطرف الفكري والتعامل الفوضوي مع الواقع الحالي عندو برشة ناس من الشعب التونسي اتّبّع فيه ومقتنعة بيه، والطريف أنو فيهم من المفروض مستواهم العلمي اعلى بكثير منهم.
- التوجّه واضح نحو هدم القيم المقدسة متاع المجتمع من "احترام الدولة" (موش نحكي عالحكومة)، "الاسرة"، "الاخلاق"، "العلم"، "الدين"، "الفن"،
- الخلط بين المفاهيم والتعامل معاها بالسطحية واللاّمبالاة القصوى، يعني: الفن= تصحّر الثقافي، العلم= أيديولوجيا، الصوفية= شعوذة، الدين= تراث، الزواج=عقد مُربح لتقاسم المصالح الشخصية. التصرّف في الجسد="Bimbo Girl"
الجيل الحالي بالأغلبية وبالنخب متاعو موش قادر بش يبني البلاد.