طريقة التصويت في الانتخابات... جهل وعمى…

بربي الي موش عاجبتهم طريقة التصويت على القوائم بأكبر البقايا...ياخي فاهمين نتيجة مواقفهم على مستقبل تونس؟

ننصحهم يشوفوا شكونها الأطراف السياسية إلي تطالب بتغييرها تو يبداو يفهموا... وننصحهم يراجعوا نتائج الانتخابات الفارطة...على ضوء اي طريقة تصويت أخرى(ما عدى التصويت على القوائم الوطنية وتوزيع المقاعد حسب النسبية بدون حاصل تعجيزي)...تو يفهموا....(موجودة في موقع هيئة الإنتخابات)…

هاذم يجهلو لوكان موش طريقة التصويت هاذي...الي وقفت نساء ورجال باش تفرضها في ما سمي بلجنة عاشور...راهي النهضة تحصلت على أغلبية ساحقة وعريضة في المجلس التأسيسي...وفرضت مشروع دستورها على أغلبية التوانسة...وتونس راهي توا في داهية…

ولوكان موش الطريقة هاذي راهو توا ولد بوه يحكم وحدو…بما ان الحزب إلي يراسو بعد بوه… راهي عندو أغلبية ساحقة وعريضة في المجلس…وراهي البلاد رجعت اتعس مما كانت عليه وقت بن علي…

ولو كان موش الطريقة هاذي…راهي ما فماش معارضة ديمقراطية تقدمية في المجلس…إلي لكلها طلعت بالفواضل والحمد لله…وراهي المعارضة الوحيدة في المجلس هي النهضة….ونكونو توا عايشين في استقطاب ثنائي قديم متجدد بين النداء إلي ورث التجمع والنهضة….

الوحيد من الأحزاب السياسية إلي فهم أنو طريقة التصويت هاذي لا يجب تغييرها….هو مع الأسف حزب حركة النهضة…صحيح لمصلحتها السياسية خاطرها أقلية في المجتمع التونسي ولو أنها أقلية كبيرة….ولكنها فاهمة ان الاستقطاب الثنائي تطلع ديما خاسرة فيها…كيما حصللها مع بن علي…وبعد الثورة مع جبهة الإنقاذ…

ولكن مع الأسف الأطراف الديمقراطية لليوم…اما تهز وتنفض وتطالب بتغيير طريقة التصويت وقت هي توا بخرمها في التحالفات الإنتخابية والسياسية وسكتاربتها وضربانها في روحها…ما تنجم تطلع للمجلس او للهياكل المحلية إلا بالفواضل…الي باش يعوم عليها التجمعيين المرسكلين في النداء…

او أنها…وهاذي عدم مسؤولية جسيمة…ما في بالهاش بالموضوع أو موش عاطيتو أهمية أو مطفية الضوء عليه…خاطر سيادتهم وقاماتهم النضالية الكبيرة ما تهتمش بالمسائل هاذي…إلي عندها صغيرة وموش "ثورية" برشة….وقت هي من أسس بناء الدولة الديمقراطية الإجتماعية…إلي يغنيو بيها للشعب…