منذ تقريبا شهر ... في المنستير ..الماء اقص علينا من 19.30الى 6.30 صباحا... بكل لامبالاة من قبل شركة الصوناد...
دخل سيدي رمضان قلنا اكيد معادش باش اقص وكان فمه عطب راهو تصلح ... لكن الموضوع متغيرش نشقوا الفطر نتجاراوا باش نغسلوا الماعون قبل ما ماء اقص ... الناس تقوم للسحور على اساس باش يرجع الماء يتوضوا واصليوا لكن الماء ما يرجعش كان السابعة صباحا واليوم الاحد لتوا مازال ما رجعش.....
وطبعا تنجموا تقولولي ايه عبيوا الماء .. اوكي نعبيوا الماء الي لون بالتراب وريحتو خايبة وكيف ادوش بيه لحمك يبدا احك فيك ... والصوناد تقول ما فيه حتى خطورة ...احنا اصلا نشريوا في الماء باش نشربوا . . وراهو الصوناد تحسس فينا كانو الماء يعطيوا فيه بلاش وبمزيتهم .. والواقع اننا ندفع فاتورات غالية وفيها ما شاء الله من الاداءات الي ديمة تزيد وعمرها ما نقصت او تغيرت بسبب انقطاعات الماء لساعات او بسبب عدم جودة المياه المقدمة ...
خلاصة القول عدم احترام المواطن الدافع للضرائب والي منحقوا يحترموه واقدمولوا خدمات محترمة موش يمشي للسبيطار او البوسطة او في حافلة او قطار او بنك او صناديق ضمان اجتماعي او لمركز باش اطلع بطاقة تعريف او باسبور او بلدية اعاملوه كحيوان ... وبكلها هازه شنفورها عليه وعاملة على جد امو مزية.
ما اتعس هذه البلاد ... ما اتعسنا