هات نبدو بالشوي من غير غش لأني البلاد بلادنا الكل، يا نمنعوا الكل يا نغرقوا الكل، والشوي الي باش ينڨزوا يجو في باريس يلحقوا فلوسهم ما همش محسوبين على الــ 12 مليون، ويجوا لتونس كان وقت الشمس.
تو السيد الرئيس كيف يستعمل عبارات كيف هكا مع وزيرة وفي صفحة رئاسة معقول؟ يجي منو؟ رئيس جمهورية القائد الاعلى للقوات المسلحة يقول انه "سيتم فضح" ماو كي قدر ربي ودخل في رواق خاطيه يقول ستقف الدولة بالمرصاد سيتصدى له القانون.. واصلا البروباغندا هذي يمررها أصحاب الصلاحيات للمؤسسات المعنية وتو كيف القضاء يوقف والقانون يشتد عودو كل شيء يمشي على أحسن ما يرام.
زيد علاش سي سعيّد عاملينا هكا للدستور؟ راهي وزارة أملاك الدولة تابعة القصبة، تتلقى التوجيهات من عند رئيس الحكومة، وانت كي تحب تنسق مجهودات الدولة بشكل ودي، تحكي مع المشيشي موش مع ليلى جفال، باهي نفرضوا المشيشي يعطى توصيات أخرى مغايرة للعطاها سعيد، موش تولي مدام ليلى تضحك على دولة تونس ورموزها، وتقلك احسنكش يا راجل ليلى لوّل!
حويجة أخرى.. تو بيان وزارة الخارجية الي هي تابعة رئيس الجمهورية، كي يقول راهو مندوب تونس لدى الأمم المتحدة انتهك واجب التحفظ، وهذا سبب كافي باش يدخل لتونس ماعادش يتعين لبرّا..
باهي وسعوا بالكم معانا!
السيد المندوب ماو قال لم اعد اثق في الرئيس واتهم اطرافا في القصر بالعبث بالتعيينات؟!
هكا والا لا؟
أي ، امالا هيا نرجعوا لخطاب الحرب الي القاه سعيد في قصر قرطاج والعالم ينقل فيه، وهو يتوعد ويتهدد ويصهين في الناس ويخوّن ويرمي في الألغاز وفي الالغام يمين ويسار..
هات نتذكروا شنو قال سعيد من الثكنات وكيفاش صفف قيادة اركان الجيش وراه وبدا يقصف في مؤسسات الدولة الاخرى..
يا جماعة.. يا أصحاب العقول، اسموا تحفظ هذا والا شنو اسموا؟!!! تو لكلمتين الي قالهم المندوب انتهاك وعدم تحفظ! والقصف الي يقول فيه سعيد ملي طرد الحامدي وبالطبيب وجاب نادية ورشيدة، اسمو سيادة دولة! مرة اخرى والله لا عنا عليه كره.. ولا عنا مشكل خاص مع سعيّد وانتخبناه..
اما الله غالب مسكين هذاك حد جهدو، ورغم ذلك قلنالوا أي نضربوا معاك بالبونية انت منتخب من الشعب ورئيس شرعي، فقط شد صلاحياتك وابعد الاحلام الكارثية، تو بالشوي بالشوي يسلك ربي حالك وتوفى العهدة دون خسائر جسيمة، غير برك انت اقرأ الدستور وحدك ما تناديش لناديا تقلها اقري هولي!!! خاصة فصل الصلاحيات سكر على روحك الباب من داخل بالبلنج واقراه وحدك تو ضال لباس بحول الله.