تحبوا الحقيقية أنا الاستعمار موش عاملي عقدة بالكل…هذاكة قانون التاريخ سيدي خويا…
كيف تبدأ قوي تصدم وكيف تضعاف يصدموا عليك آمس واليوم وغدوة…ما يتبدل كان آليات الهيمنة وأدواتها….
هاك النهار كيف قرطاج تعبر في المتوسط.. دزت على روما عبر جبال الآلب وفي معركة كانو التاريخية فتقتها من بعضها..ولولا الروح الشرقية لحنبعل ومسحوق الشفقة الزائد قرطاج راهي حوّلت روما إلى مقاطعة تابعة لفيلق الجيش القرطاجي في سليانة( سيليانوس)..
كيف ضعفنا صدموا علينا الرومان ردمونا بالملح…نورمال.. دارت الأيام وخرجت جيوش المسلمين من القيروان ودزت على اسبانيا فيبالنا غزوة ونروحوا …ياخي قعدنا فيها 8 قرون …حتى اسمها بدلناه الأندلس… قواو علينا رجعوا إسبانيا وطردوا منها العرب…
ناس متقلقة من فرنسا قعدت في تونس 75 سنا وعاملتلهم عقدة نفسية مع المستعمر وكذا….. تي نحن صقلية ضربنا فيها 3 قرون لليوم ياكلوا في الكسكسي بالزبيب هههه تي الباي كان كيف تعجبوا جارية طليانية يعطيهم جزيرة ويبعثوهالوا ههههه والله لا هو عاملي عقدة الاستعمار خلاص…تي أنا في كاس العالم نشجع إسبانيا والبرتغال…قتلي مرتي علاش؟ قلتلها خاتر مستعمرات قديمة متاعنا…وعادي كريستيانو رونالدو جدو العاشر يكون أسمو حمّادي …هههه
أقروا برشة تاريخ تو تعرفوا شكون كان يحكم في العالم والبحر المتوسط ويعمل في البراكاجات بالسفن عبارة على موتور…. هههه
تقولولي العالم تبدل وعصر جديد للإنسانية…فسرولي شكون عمل براكاجات لحمولات الأدوية وكمامات في جائحة كورونا…. ما تبدل شي في قانون التاريخ كان مساحيق التجميل…. يحترموك كيف تبدأ محترم وقوي وذكي ما عدا هذا يغوروا عليك وعينك تغزر…
ونحن علمانهم كيفاش يغوروا…. ماكانوش يعرفوها ههههه في لعبة التاريخ والحضارات كليت شلبوق أسكت.